मेटा-इन्स्टाचे अकाऊंट 'या' माध्यमातून व्हेरिफाय होणार?
मेटाने आपली व्हेरिफाइड सेवा भारतात लाँच केली आहे. या अंतर्गत ग्राहकांना फेसबुक आणि इन्स्टाग्राम अकाउंटवर ब्लू टिक आणि व्हेरिफाइड बॅजसाठी शुल्क द्यावे लागणार आहे. युजर्सला हे सब्सक्रिप्शन आयओएस आणि अँड्रॉइडवर 699 रुपये प्रती महिना शुल्क भरून विकत घेता येणार आहे. मेटा व्हेरिफाइड सर्व्हिसेस अंतर्गत युजर्स सरकारी आयडीच्या माध्यमातून आपले अकाउंट व्हेरिफाय करु शकतात. ट्विटरही ब्लू टिकसाठी शुल्क आकारते.
देशभरात पेट्रोल स्वस्त होण्याची शक्यता
रशियाने भारताला प्रतिबॅरल 16 डाॅलर सवलतीत कच्च्या तेलाची विक्री केली. त्यामुळे कंपन्या नफ्यात आल्या. म्हणून पेट्रोल-डिझेल लवकरच स्वस्त होऊ शकते. एप्रिलमध्ये कच्च्या तेलाची किंमत प्रतिबॅरल 83.76 डाॅलर होती, ती गुरुवारी (8 जून) 74.85 डाॅलर झाली. 2022-23 मध्ये रशियाकडून स्वस्त तेल खरेदी केल्याने सरकारचे 3.6 अब्ज डॉलर्स (30 हजार कोटी रुपये) वाचले. त्यामुळे पेट्रोलियम मंत्रालयाच्या सूत्रांनुसार, नफ्याचा फायदा जनतेला देण्यासाठी तेल कंपन्यांशी चर्चा सुरू केली आहे.
कॅनडाच्या जंगलात लागलेल्या वणव्याचा धूर अमेरिकेपर्यंत!
कॅनडाच्या जंगलात लागलेल्या वणव्याचा धूर अमेरिकेपर्यंत पोहोचला आहे. यामुळे अमेरिकेच्या पूर्व किनारपट्टीवरील सर्व शाळांनी विद्यार्थ्यांना बाहेर पडण्यास बंदी घातली आहे. इथे आकाशात पिवळे धुके आहे. धुरामुळे न्यूयॉर्कसह अमेरिकेतील अनेक राज्यांमध्ये प्रदूषणाबाबत अलर्ट जारी करण्यात आला आहे. अहवालानुसार, शिकागो ते अटलांटा पर्यंत सुमारे 10 कोटी लोक प्रदूषणाच्या विळख्यात आहेत. अमेरिकेने 600 अग्निशमन दल कर्मचारी कॅनडात पाठवले. आतापर्यंत सुमारे 38 हजार चौरस किलोमीटर क्षेत्र जळून खाक झाले आहे. यामुळे 1 लाख 20 हजारांहून अधिक लोकांना घरे सोडावी लागली आहेत.